နိုင်ငံတနိုင်ငံရဲ့ ယဉ်ကျေးမှုကို လေ့လာတယ်ဆိုတာ ဘဝအတွက် အကောင်းဆုံး သင်ခန်းစာပါ။ ယဉ်ကျေးမှုကို လေ့လာခြင်းက အဲဒီနိုင်ငံရဲ့ လူနေမှုစနစ်ကို အကောင်းဆုံး သိနိုင်တဲ့ နည်းလမ်းပါပဲ။ ဒီအချက်က ကိုယ်ခရီးသွားတဲ့အခါ အကောင်းဆုံး အထောက်အပံ့ ဖြစ်ပါလိမ့်မယ်။
ယဉ်ကျေးမှုတိုင်းမှာ သူ့ကိုယ်ပိုင် စည်းမျဉ်းစည်းကမ်းနဲ့ သူ့ကိုယ်ပိုင် ဝတ်စားဆင်ယင်မှုဆိုတာ သီးခြားရှိတဲ့အရာတွေပါ။ သူတပါးရဲ့ ယဉ်ကျေးမှုကိုလေ့လာခြင်းက ဒေသခံတွေနဲ့ ဆက်ဆံတဲ့အခါ ရင်းနှီးနွေးထွေးတဲ့ ဆက်ဆံရေးကို တည်ဆောက်နိုင်မှာဖြစ်သလို နားလည်မှုလွဲစေနိုင်တဲ့ အသေးအဖွဲ ကိစ္စတွေကိုလည်း ရှောင်လွဲနိုင်ပါလိမ့်မယ်။ အခု ဖော်ပြပေးမယ့်အချက်အလက်တွေကတော့ မြန်မာ့လူ့အဖွဲ့အစည်းမှာ အရေးကြီးတဲ့ မရှိမဖြစ် လိုအပ်တဲ့ ယဉ်ကျေးမှုစနစ်တွေပါပဲ။
(၁) မိသားစု
မြန်မာ့ယဉ်ကျေးမှုစနစ်မှာ မိသားစုဟာ အရေးကြီးတဲ့ အခန်းကဏ္ဍကနေ ပါဝင်ပါတယ်။ မိသားစုတစုမှာ ဖခင်က အိမ်ထောင်ဦးစီးနေရာကို ယူထားလေ့ ရှိတတ်ပါတယ်။ ဝင်ငွေ လစာအနေနဲ့ကလည်း မိခင်ဖြစ်သူထက် ပိုရှာရလေ့ရှိပြီး မိသားစုရဲ့ကုန်ကျစရိတ်တွေကို တာဝန်ယူရလေ့ ရှိပါတယ်။
အစဉ်အလာအရဆိုရင်လည်း ငယ်ရွယ်သူတွေက သက်ကြီးရွယ်အိုတွေကို စောင့်ရှောက်ရလေ့ ရှိပါတယ်။ သက်ကြီးရွယ်အိုတွေကို စောင့်ရှောက်ခြင်းက ကျွေးမွေးပြုစုလာခဲ့ကြတဲ့ လူကြီးမိဘတွေကို အကောင်းဆုံး ကျေးဇူးဆပ်နည်းတမျိုးလို့ ယူဆထားကြပါတယ်။ ယေဘုယျအားဖြင့်တော့ အတတ်ပညာတွေ စုံသွားပေမယ့်လည်း အိမ်ထောင် မပြုရသေးမချင်း မိဘတွေနဲ့ အိမ်ခွဲနေလေ့ မရှိကြပါဘူး။
